శృంగేరీ పీఠాధిపతి శ్రీ శ్రీ శ్రీ భారతీ తీర్థ స్వామి
విరచిత ‘గరుడ గమన తవ’ కృతి
‘‘ఓ గరుడ వాహనా, నీ పాదపద్మాలు నా మనస్సునందు నిత్యమూ ఉద్దీపనం చేయి. నన్ను తాపాలు, పాపాల నుంచి విముక్తుడిని చేయి.
ఓ పద్మ నేత్రా.. బ్రహ్మేంద్రాది విబుధ గణాలచే వినతులు పొందు పాదపద్మాలు కలవాడా నన్ను తాపాలు, పాపాల నుంచి విముక్తుడిని చేయి.
ఓ ఆదిశేష తల్పశయనా.. మన్మథుడి తండ్రీ.. నా జనన, మరణ భయాల్ని తీర్చేవాడా.. నన్ను తాపాలు, పాపాల నుంచి విముక్తుడిని చేయి.
ఓ శంఖ చక్రధరా.. దుష్టరాక్షసులను దునుమాడి సర్వలోకాలనూ రక్షించేవాడా.. నన్ను తాపాలు, పాపాల నుంచి విముక్తుడిని చేయి.
లెక్కించలేనన్ని సుగుణాలు కలవాడా.. దీనులకు దిక్కైనవాడా.. దేవతల శత్రువులను దునుమాడేవాడా.. నన్ను తాపాలు, పాపాల నుంచి విముక్తుడిని చేయి. నీ భక్తుడైన ఈ భారతీ తీర్థుని మహాకరుణతో రక్షించు.. నన్ను తాపాలు, పాపాల నుంచి విముక్తుడిని చేయి’’ అనే అర్థం గల పాట ఇది.
----------------------
గరుడ గమన తవ చరణ కమల మిహ
గరుడ గమన తవ చరణకమల మిహ
మనసి లసతు మమ నిత్యమ్
మనసి లసతు మమ నిత్యమ్ ॥
మమ తాపమపాకురు దేవ
మమ పాపమపాకురు దేవ ॥
1. జలజనయన విధినముచిహరణముఖ-
విబుధవినుత-పదపద్మ -2
మమ తాపమపాకురు దేవ
మమ పాపమపాకురు దేవ ॥
2. భుజగశయన భవ మదనజనక మమ
జననమరణ-భయహారీ -2
మమ తాపమపాకురు దేవ
మమ పాపమపాకురు దేవ ॥
3. శఙ్ఖచక్రధర దుష్టదైత్యహర
సర్వలోక-శరణ -2
మమ తాపమపాకురు దేవ
మమ పాపమపాకురు దేవ ॥
4. అగణిత-గుణగణ అశరణశరణద-
విదలిత-సురరిపుజాల -2
మమ తాపమపాకురు దేవ
మమ పాపమపాకురు దేవ ॥
5. భక్తవర్యమిహ భూరికరుణయా
పాహి భారతీతీర్థమ్-2
మమ తాపమపాకురు దేవ
మమ పాపమపాకురు దేవ ॥
------------ ----------------
ఈ పాటలో ముఖ్యంగా ఉన్నది - రెండు విషయాలు- మొదటి పంక్లిలో భగవంతుని గుణవిశేషణాలతో సంబోధన.
రెండవ అంశం- అటువంటి గుణవిశేషాలు కలిగిన తండ్రికి ప్రార్థన.. ఇది పునరావృతమవుతుంటుంది.
-------------- --------------
గరుడగమన, తవ చరణకమలమ్ ఇహ మనసి లసతు మమ నిత్యమ్ ॥
గరుడగమన, తవ చరణకమలమ్ ఇహ మనసి మమ నిత్యమ్ లసతు ॥
గరుడ-గమన, = ఓ గరుడుని వాహనంగా కలిగినవాడా, గరుడునిపై విహరించేవాడా
తవ చరణకమలమ్ = నీ పాదాలనే కమలాలు
ఇహ మమ మనసి = ఇక్కడ నా మనసులో
నిత్యం లసతు = ఎల్లప్పుడూ విలసిల్లుగాక
మమ తాపమ్ అపాకురు దేవ = నా పాపాన్ని హరించు.
మమ పాపమ్ అపాకురు దేవ = నా తాపాన్ని హరించు.
(ఇదే పంక్తి ప్రతి చరణంలో పునరావృతమవుతుంది.)
ఇక చరణాలు-
1. జలజ-నయన, విధి-నముచి-హరణ-ముఖ-విబుధ-వినుత-పద-పద్మ
జలజ-నయన = ఓ కమలముల వంటి కన్నులు కలిగినవాడా
విధి-నముచి-హరణ-ముఖ-విబుధ-వినుత-పద-పద్మ ==
విధి- = బ్రహ్మ
నముచి-హరణ- = ఇంద్ర (నముచి అనే రాక్షసుని సంహరించినవాడు)
ముఖ- = ముఖ్యంగా కలిగిన
విబుధ-వినుత- = విబుధజనులచేత స్తుతింపబడే
పద-పద్మ = పాదపద్మాలు కలిగినవాడా
అంటే ఎవరి చరణాలనే పద్మాలను బ్రహ్మాదులు స్మరిస్తారో, (స్తుతిస్తారో) అటువంటివాడు.
నా పాపాన్ని హరించు, నా తాపాన్ని హరించు.
2. భుజగ-శయన, భవ-మదన-జనక, మమ జనన-మరణ-భయ-హారీ ॥
భుజగ-శయన = పాము శయ్యపై పడుకుని ఉండేవాడా
భవ-మదన-జనక = సంసారానికి, మన్మథుడికి తండ్రి అయినవాడా
మమ జనన-మరణ-భయ-హారీ = నా జన్మ, మరణం అనే భయాన్ని పోగొట్టేవాడా
నా పాపాన్ని హరించు, నా తాపాన్ని హరించు. .
3. శఙ్ఖ-చక్ర-ధర దుష్ట-దైత్య-హర సర్వ-లోక-శరణ ॥
శఙ్ఖ-చక్ర-ధర = శంఖాన్ని చక్రాన్ని ధరించినవాడా
దుష్ట-దైత్య-హర = దుష్టులైన రాక్షసులను సంహరించేవాడా
సర్వ-లోక-శరణ = అన్ని లోకాలకు శరణు అయినవాడా
నా పాపాన్ని హరించు, నా తాపాన్ని హరించు.
4. అగణిత-గుణగణ అశరణ-శరణద విదలిత-సుర-రిపు-జాల ॥
అగణిత-గుణగణ = లెక్కపెట్టలేనన్ని గుణాల గణాలు (గుంపులు) కలిగినవాడా
అశరణ-శరణద = శరణులేనివారికి శరణు ఇచ్చేవాడా
విదలిత-సుర-రిపు-జాల ==
విదలిత- = చీల్చినవాడా
సుర- = సురులు అంటే దేవతల యొక్క
రిపు- = రిపులు అంటే రాక్షసులను
జాల = జాలాలను, (దళాలను)
నా పాపాన్ని హరించు, నా తాపాన్ని హరించు.
5. భక్తవర్యమ్ ఇహ భూరి కరుణయా పాహి భారతీ-తీర్థమ్ ॥
ఇహ భక్తవర్యమ్ భారతీ-తీర్థమ్ భూరి కరుణయా పాహి ॥
భక్తవర్యమ్ = భక్తులలో అగ్రగణ్యుడిని
భారతీ-తీర్థమ్ = భారతీ-తీర్థుని (రచయిత మహాస్వామి)
ఇహ = ఇక, ఇక్కడ
భూరి కరుణయా = చాలా కరుణతో
పాహి = రక్షించు
నా పాపాన్ని హరించు, నా తాపాన్ని హరించు.
◆ ◆ ◆
